Վարազդատ Հարոյանը ավարտում է կարիերան ազգային ընտրանու կազմում

Հայաստանի ազգային հավաքականի  պաշտպան, թիմի ավագ` Վարազդատ Հարոյանն ավարտում է կարիերան ազգային ընտրանու կազմում:

Հայ ֆուտբոլիստն այս մասին հայտնել է «Արմենպրես» լրատվականի հետ զրույցում:

«Զգացի, որ արդեն ժամանակն է: Ես հավաքականում անցկացրել եմ 92 հանդիպում ու հավաքականն էլ ինձ շատ բան է տվել կարիերայում: Ես էլ իմ կարիերայի 15 տարին անմնացորդ նվիրել եմ հավաքականին: Միշտ խաղացել եմ նվիրված ու միշտ պատրաստ եմ ներկայացել: Մեր նորանշանակ մարզչից հետո հասկացա, որ գնալու ժամանակն է: Քանի որ իրոք փորձել եմ այդ մարդու հետ աշխատել ու չի ստացվել: Մենք տարբեր աշխարհների մարդիկ ենք»,- ասել է Հարոյանը:

Վարազդատ Հարոյանը Հայաստանի  ազգային ընտրանու կազմում իր նորամուտը նշել է 2011 թվականին, որի կազմում ընդհանուր առմամբ մասնակցել է 92 հանդիպման, դարձել 4 գոլի հեղինակ: Նա երկար տարիներ կրում էր թիմի ավագի թևկապը:

Լուսանկարը` ՀՖՖ

ՀԵՂԻՆԱԿ` ՎԼԱԴԻՄԻՐ ԳԱԲՐԻԵԼՅԱՆ