Քևին Դե Բրույնեն հաջորդ շաբաթ կընտրի երկու տարբերակից մեկը

Քևին դե Բրույնեն իր ապագայի վերաբերյալ որոշում կկայացնի հաջորդ շաբաթ։ Հիշեցնենք, որ 33-ամյա կիսապաշտպանը կլքի «Մանչեսթեր Սիթին» ընթացիկ մրցաշրջանի ավարտին։

Լրագրող Բեն Ջեյքոբսի խոսքով՝ խաղացողը վերջին մի քանի օրերին համաձայնեցրել է ֆինանսական պայմանները «Նապոլիի» հետ, սակայն քննարկվում է նաև «Չիկագո Ֆայրի» առաջարկը։ MLS ակումբը առաջարկում է առնվազն 12 միլիոն դոլար մեկ մրցաշրջանի համար, ինչը կրկնակի ավելի է, քան նեապոլիտանական ակումբի առաջարկը։ Միաժամանակ, բելգիացին որոշում կկայացնի՝ հիմնվելով ոչ թե ֆինանսական պարամետրերի, այլ իր ընտանիքի և 2026 թվականի Աշխարհի առաջնության նախապատրաստության համար լավագույնի վրա։

Նշվում է, որ երկու ակումբներն էլ պատասխան են ակնկալում մրցաշրջանի ավարտից հետո։ Դե Բրույնեն ինքը դեռ պետք է պարզի՝ կխաղա՞ աշխարհի ակումբային առաջնությունում, թե՞ ոչ։