Լյորենտե. «Ես ուզում եմ ավարտել կարիերաս «Ատլետիկոյում»

«Ատլետիկո Մադրիդի» և Իսպանիայի հավաքականի կիսապաշտպան Մարկոս Լյորենտեն նշել է, թե որտեղ է ցանկանում ավարտել իր պրոֆեսիոնալ կարիերան։

«Ես ուզում եմ ավարտել կարիերաս «Ատլետիկոյում»։ Ես ուզում եմ ավելի երկար մնալ ակումբում և հույս ունեմ համաձայնության գալ պայմանագրի երկարաձգման շուրջ։ Ես ինձ գնահատված եմ զգում այս ակումբում։ Բայց ես չեմ պատկերացնում ինձ խաղալ 35 տարեկանից հետո», -  Լյորենտեի խոսքերը մեջբերում է` Ֆաբրիցիո Ռոմանոն X սոցիալական ցանցի իր էջում հղում անելով Sport.es-ին։

31-ամյա Լյորենտեն «Ռեալ Մադրիդի» երիտասարդական համակարգի սան է։ Նա առաջադիմել է ակումբի երիտասարդական թիմում, ինչպես նաև խաղացել է ավագ թիմում, որտեղ նվաճել է Չեմպիոնների լիգայի երկու տիտղոս և մեկ ակումբային աշխարհի գավաթ։ Մարկոսը նաև նվաճել է ՈՒԵՖԱ-ի Սուպերգավաթը և Իսպանիայի Սուպերգավաթը։ 2019 թվականի ամռանը կիսապաշտպանը միացել է «Ատլետիկո Մադրիդին» 30 միլիոն եվրոյի դիմաց։ «Մատրասներ պատրաստողների» կազմում Լյորենտեն խաղացել է 291 խաղ, խփել 36 գոլ և կատարել 43 գոլային փոխանցում, ինչպես նաև նվաճել է Իսպանիայի առաջնության տիտղոսը։