Ռունին քննադատեց Ռաֆինյայի վերջնական տեղը

«Մանչեսթեր Յունայթեդի» նախկին հարձակվող Ուեյն Ռունին դժգոհ էր 2025 թվականի «Ոսկե գնդակի» քվեարկության արդյունքներից։ Մրցանակը շնորհվեց «Պարի Սեն Ժերմենի» ֆրանսիացի թևային Ուսման Դեմբելեին ։ «Բարսելոնայի» բրազիլացի թևային Ռաֆինյան , ում Ռունին կարծում էր, որ արժանի է հաղթելու, զբաղեցրեց հինգերորդ տեղը։

«Սա ուղղակի կատակ է։ Ինչո՞ւ Ռաֆինյան զբաղեցրեց ընդամենը հինգերորդ տեղը, իսկ Վիտինյան՝ երրորդը։ Ի վերջո, հենց Ռաֆան էր, որ առաջնորդեց իր թիմին կարևոր պահերին, խաղաց սրտով ու հոգով և մեզ կախարդական երեկոներ պարգևեց։ Եթե նա արժանի չէ «Ոսկե գնդակին», ապա ի՞նչն է արժանի։ Կարծում եմ՝ նա արժանի էր առաջին տեղին», - Ռունիի խոսքերն է մեջբերում Barca Universal-ը։

Նշենք, որ քվեարկության արդյունքում երկրորդից չորրորդ տեղերը բաշխվել են հետևյալ կերպ՝ Լամին Յամալ (Բարսելոնա)՝ երկրորդ, Վիտինյա (ՊՍԺ)՝ երրորդ, Մոհամեդ Սալահ (Լիվերպուլ)՝ չորրորդ։

Անցած մրցաշրջանում բրազիլացի հարձակվողը մասնակցել է 57 հանդիպման բոլոր մրցաշարերում, դարձել 34 գոլի և  25 գոլային փոխանցման հեղինակ: «Բարսելոնայի» հետ Ռաֆինյան հաղթել է Լա լիգան, Իսպանիայի գավաթը և Իսպանիայի Սուպերգավաթը։